١٠٦- سوورەتى (قوڕەیش)ـە. مەککەییەو (٤) ئایەتە. بەناوى خواى بەخشندەى میهرەبان ئەم سوورەتە هەندێ لە نیعمەت و بەهرەکانى خوا یادى قوڕەیش دەخاتەوە، ئەوە بوو زۆر بە ئاسوودەیى و، بێ ترس لە هیچ کەسێک، هاتوچۆى زستانەو هاوینەیان دەکرد بۆ بازرگانى، هات و چۆى (یەمەن)و (شام)یان دەکرد لەو پەڕى خۆشیى و ئارامییدا، وە هیچ کەسێک نەبوو دەست بێنێتە ڕێگەیان. قوڕەیش هەقە خاوەنى کابە بپەرستن: [ بِسْمِ اللَّـهِ الرَّحْمَـٰنِ الرَّحِيمِ * ١ لِإِيلَافِ قُرَيْشٍ ] لەبەر هۆگریى و یەکگرتنى قوڕەیش .

[ ٢ إِيلَافِهِمْ رِحْلَةَ الشِّتَاءِ وَالصَّيْفِ ] هۆگریان بە هاتووچۆى زستانەو هاوینەوە (زستان بۆ یەمەن و، هاوینیش بۆ شام) .

[ ٣ فَلْيَعْبُدُوا رَبَّ هَـٰذَا الْبَيْتِ ] جا لەبەر ئەو بەهرە گەورەیەى خوایە بەسەریانەوە، دەبا هەر خاوەنى ئەم خانەیە (كعبة الله) بپەرستن و هەموو هەر بۆ ئەو سەر دانوێنن، چونکە لە ژێر سێبەرى ئەمن و ئاساییشى کابەدا ئەوان ئەو هات و چۆیە ئەنجام دەدەن، وەک خواى مەزن دەفەرموێ: [ إِنَّمَا أُمِرْتُ أَنْ أَعْبُدَ رَبَّ هَذِهِ الْبَلْدَةِ الًّذِي حَرَّمَهَا وَلَهُ كُلُّ شَيْءٍ وَأُمِرْتُ أَنْ أَكُونَ مِنْ الْمُسْلِمِينَ ] ٢٧/٩١.

[ ٤ الَّذِي أَطْعَمَهُم مِّن جُوعٍ وَآمَنَهُم مِّنْ خَوْفٍ ] ئەو خوایەى بەو هۆیەوە قوتارى کردن لە برسێتیى و هێوریشى کردنەوە لە ترس، واتە: ترسیان لە هیچ دزو درۆزنێک نەما بێتە ڕێگەیان و رێیان پێ بگرێ، ئەویش بەهۆى حورمەت و رێزى کابەوە بوو، کە لە باوو باپیرانیانەوە بۆیان مابووەوە رێزنان لە کابە، جا ئایا لە بەرامبەر هەر بەهرەیەکى خواییەوە سوپاسێک پێویست ناکات..؟ ئاى ئادەمیى چەند سپڵەیت..؟!